fredag 30. mai 2008

Opplevingar i det vesle utland, dag 3-4

Jepp, me har nye opplevingar...

Frida har brukt over ein time heim fra sentrum i Tartu til hotellet, kjopt berre lilla kle og klart a pakka ned nesten alle tinga sine.

Anja har blitt ven med gitarspelande estlendarar i parken, spelt krig pa busstasjonen i to estiske byar og provd eit utal bukser.

Monica har nynna Mellom bakkar og berg bade i parken i Tartu og i gamlebyen i Tallinn, vore sjuk stakkar og brukt tofler pa restaurant.

Eg har kjopt solbriller, blitt flau over selskapet, nesten blitt lei av murstein og sett storkereir - med stork!

Me har alle vore pa battur pa elvi i Tartu, teke bilete av dei kysande studentane i same by, huska i hagegynge, fatt myggstikk, ete god mat, teke buss til Tallinn i 40 grader eller so - og er glade me ikkje har laert a banna pa estisk-, gatt i gamlebyen utan a vera innom ei einaste souvenirsjappe - det kjem vel i morgon -, hoyrt pa estiske gutar som song pa gata, og brukt litt meir peng enn det kontoen talar.

Og i morgon ventar ein ny dag i Tallinn! Me gler oss til det

Oppdatering 1. juni: Har komme bilete her og gitt... Frida utanfor universitetet sitt i Tartu, Anja og Monica som spelar Krig på busstasjonen og dei kyssande studentane i fontena på rådhusplassen

onsdag 28. mai 2008

Estland dag 1-2

Jepp, då var flokken i Estland! Her skin soli, og Frida lever enno. Begge er gode ting.
Me kom seint i går kveld, gjekk ned saman med soli over Tallinn og fann hotellet vårt. då me gjekk ut av drosjen greip panikken oss, men heldigvis var brakka me såg nabohuset. Rommet vårt låg derimot over ein strippebar, men det gjorde ikkje noko.

I dag tidleg sto me opp, åt kebab til frukost og hoppa på ein trikk til busstasjonen. Bussen tok oss frå Tallinn til Tartu, der me skulle treffa Frida. Eg fekk det for meg at me måtte skunda oss av bussen, noko som gav oss ein ekstra gåtur med sekk og trillekoffert, for me var ikkje i nærleiken av busstoppet ein gong. Og ja, dette kjem eg til å få høyra ei stund.
Men Frida fann oss, og etter å ha sjekka inn på Hotel Aleksandri har me handla mat og ete i ein park, og er no på rommet til Frida, har helst på kinesaren hennar og inspisert badet. Planane for kvelden og morgondagen er enno ikkje heilt klare - rykta går om fest på studentheimen, båttur i morgon ettermiddag, spabesøk, shopping osv. Fredag fer me attende til Tallinn.
Det beste her er eigentleg ikkje at det er sol eller at maten er billeg eller noko slikt, men at me er samla att, og får sjansen til å nyta fine vår/sommardagar saman i eit land me ikkje kjenner. Eg gledar meg!

(bilete kjem, men kanskje ikkje før eg kjem heim att...)
Oppdatering 1.juni: Bileta er komne - Anja og Monica på det ekstremt nakne hotellrommet i Tallinn, Anja og Monica som tek pause medan eg prøver å finna vegen i Tartu...

søndag 25. mai 2008

Alta

I Alta er det ikkje mørkt om natta. Men det er overskya, so me fekk ikkje sjå midnattssol denne gongen heller. Og so er det kaldt der. Ikkje kjempekaldt, men som heime ein gong i mars. Gåsungane på selja er alt frå forsiktige dun til strålande gule fjon, og nokre få hestehovar sto i grøftekantane. Men det ligg snø i skuggesidene, fjorden blinkar kald, og det er brunt i alle hagar.

I Alta bur óg Ask med familien, og han vart konfirmert laurdag. Det var ei kosleg helg, særleg trur eg ungdommane koste seg mykje, det er ikkje ofte dei treff kvarandre - og det vart seint stille i gamma i hagen der dei seks eldste av dei yngste låg.

Rart å stiga av flyet etter vel halvanna time, og reisa frå midt i mars til slutten av mai, og plutseleg kjenna ein har sommarferie, at ein ikkje berre har forvilla seg attende i tid til ein framand stad der dei snakkar rart og der det aldri vert mørkt. På veg heim frå Gardermoen fekk mamma og eg vår opplevingsferie óg, me var to og ein halv time på Hadeland Glassverk, og mamma kom ut att utan å ha kjøpt ein einaste nisse eller engel. Derimot vart det ein del grøne og blå skåler...

(Biletet er frå feltet med helleristingar i Alta. Det såg me sist me var der, august 2002. Heller ikkje då var det midnattssol...)

torsdag 22. mai 2008

Avslutningsfest

I går kveld var det avslutningsfest for 2005-kullet på Språk og informasjon. Dei åtte i gruppa møtte, i tillegg til fire koordinatorar og medlemmer i programstyret - og tapas på Lille Escalon vart ein suksess. Den fyrste av dei eldste trekte seg attende i ellevetida, medan dei siste seks ramla ut av dørene på ein stengt bar nærare halv tre.

Det kan vel seiast stemninga var høg allereie tidleg på kvelden. Forsøket på å drikka førelesaren under bordet slik at han røpa eksamensresultata var ikkje vellukka, men skumle professorarar og fyrsteamanuensisar vart plutseleg meir tilnærmelege. Det vart mykje latter frå studentgruppa og, sjølv om eg trur omlag alle hadde eit eller anna utbrot av det meir sentimentale slaget i løpet av kvelden. For det er jo ein epoke som er slutt, nemleg den perioden då eg ikkje anar kva eg skal svara når folk spør kva eg studerar.

(bilete: Anda viser fram gifteringen)

tysdag 20. mai 2008

Flystreik

Flystreiken gjer det tungvint å røra på seg i Noreg, og ut over grensene. Ei veninne måtte reisa frå Bergen nesten eit døgn før tida i helgi, ei an kom med nattbuss om Oslo heim frå bryllaupet sitt. Konfirmasjon i Alta er blitt eit bal, og planane framover er usikre. Toga er fulle, busselskapa har gode tider, og folk klagar.
Eg klagar og. Eg likar ikkje at eg ikkje får lagt planar. Men ein samtale i dag minte meg på eit anna aspekt ved streiken - at det er godt at den finst. Det er godt at me bur i eit land der ein har ytringsfridom og lov til å streika. At me bur i eit land der det er so kort veg til makta at det er vits for bakkemannskap eller sjukepleiarar å streika, der det er vits for ein ungdomsorganisasjon å driva underskriftskampanje, der det er vits å prøva å endra på det ein meinar er urettvist, innanlands eller utanlands. At me bur i eit land som er so bra at, sjølv om ikkje alt er perfekt, me kan bry oss om andre, i tillegg til oss sjølv. At det er bra at ein ikkje får sparken eller vert fengsla om ein hevar stemma mot maktpersonane. Det er ikkje alle land der makta er so nær folket, og midt i klaging, frustrasjonar og stranda planar, kan det vera lurt å hugsa det.

måndag 19. mai 2008

Ferdig!

No har eg skrive ut mappa mi i to eksemplar, stifta og butte saman, skrive sidetal på og sett over ei ekstra gong. So no er eg ferdig med dette semesteret, og denne graden!
I morgon skal eg feira med å levera mappa, eit kafebesøk, slå plenen og rydda i kjellaren. Og onsdag vert det middag og fest med kullet. Æ glæde mæ!
Men det beste med å vera ferdig er at andre ikkje er det - eg likar å ha fri medan andre jobbar... Eg trur eg er litt ond. Muhahahaha

laurdag 17. mai 2008

17. mai

Tidleg opp. Skiftande ver. Skognag.
God frukost. Latter i toget. Dans.

17. mai var kosleg i år og. Berre ein is er i minste laget merkar eg (lurer på å henta meg ein på kjøkenet før klokka passerar tolv), men dagen har blitt brukt i "gode venners lag", med frukost klokka åtte, tog med BUL Ervingen klokka halv elleve, roleg ettermiddag i Gimle, på Ynglingen og Peppes, folkedans på Festplassen, og Cafe Opera som avslutning.

Nei vent, senga er avslutninga - og til tross for flott dag i byen: eg gledar meg til å krypa under dyna og sova til eg vaknar. 16 timar i bunad tek på.

(bilete: dansarar og spelemann i hovudprosesjonen - me er spreke folk!
Eivind, Monica og Wiebke, so pene atte
Dansing på festplassen - eg er med der ein stad eg og altså)

tysdag 13. mai 2008

Sæle er...

Salige er de fattige i Aanden møtte oss når me kom inn i eksamenslokalet. Det kunne vore verre. Men eg kjem ikkje på noko i farten.
Men uansett, eksamen er overstått på minimal tid - no ventar tre oppgåver som må skrivast om i løpet av den neste veka.

måndag 12. mai 2008

Siste dag før eksamen

har gått med til desse aktivitetane:

- stå opp litt for seint (litt grunna nattmanøver i indiacaklubben - kviskrespeling i hagen til me ikkje såg den sjølvlysande dingsen meir. Litt grunna min generelle døgnrytme)

- oppretta Facebookgruppe for Mindevegen Indiacaklubb (til ære for den viktigaste rekreasjonsdingesen me har for tida)

- sitja med beina i senga og stirra i veggen (noko som faktisk er sentralt for mi lesing, ettersom det er der notatane mine heng)

- reisa til Storetveitmarken og spela indiaca

- eta rullekebab utanfor Top Haiz (eller Hair som det eigentleg heiter)

- stirra litt til på veggen (svært lite til)

- bli klypt av Anja (noko ho har hatt lyst til å gjera det siste halvåret) (og kan du undrast på kvifor eg har utsett det når du ser biletet?)

- stirra på veggen i lag med Monica, som er litt oppgitt over både mi skrift og dei rare orda

- sjå film

Kirsebærtreet

Det stend eit tre i hagen
og sprikjer i vårkalde dagen
med skinande nysnjo-grein.
Det duskar mot stoveglaset
og drys yver fjorgamle graset
blomane ein for ein.

Og det er kirsebærtreet
innanfor hageleet
som blømer i tidleg vår.
Mot gråe skytjeveggen
luter det krokne leggen
og signar oss atter eit år.

Tusund angande blomar
brusar um tak og plomar;
heilagt og kvitt og stilt
skin det i døkke næter
og freden i tunet gjæter
- ei jartegn på vår og mildt.

Det speglar seg bljugt i strondi,
og minner om austerlondi,
um japanske hagar og dikt.
Det tøygjer toppen i tråe
mot alle snjofjell blåe
til vår i kulden vigt.
Olav H. Hauge

Biletet er teke heima i Lærdal for akkurat eit år sidan. Mamma sender meldingar til mobilen min med vårbilete heimanfrå, antakleg for å minna meg om kva eg går glipp av som er i Bergen heile våren. Kjære mamma, eg veit det. Bergen er flott, men ikkje ein gong rhododendron og kristorn sler Lærdal, og kirsebærtreet i hagen der.

søndag 11. mai 2008

Eksamenslesing?

Det er to knappe dagar til eksamen no. Det fører til konstant dårleg samvit, for det er so lett å gjera andre ting. Som å grilla i hagen, gå tur i byen, sitja på plenen og nyta soli eller reisa til Gamlehaugen på piknik og soling. Men endeleg har 25 ark fulle av notatar funne vegen opp på veggen min - no er det att å pugga dei.

torsdag 8. mai 2008

Ikkje akkurat beskjeden

Eg har blitt sjekka opp. Av ein 6. klassing. Det har ikkje skjedd sidan eg sjølv gjekk i 4. Og ein kan vel sei at han ikkje nett var beskjeden - eventuelt at han har sett for mykje på Friends el.l. Ei interessant oppleving (hadde han endå vore 12 år eldre...)

tysdag 6. mai 2008

Kjærleiksdikt

I kveld les huset dikt ("hysj, eg har eit rykte å bevara!"), og fleire og fleire vert lesne høgt av eit par av oss. Og me er imponerte over kva folk kan skriva, og uttrykka med so få ord.

Jag etter kjærligheten, sa'n. Ja, sa vi.
O cykkelstyre. O kjærlighet.
Dæ va ei gång, å ænno bløme nabne hass i hænna.
Og so vakna um morgonen tvo gylne kveitekakor!

Ja, det er kjærleiksdikt. Men dei kan få sagt det - Rolf Jacobsen, Nordhal Grieg, Kari Bakke og Olav H. Hauge! Det er ein viss sjanse for at desse dikta dukkar opp att seinare på bloggen - mellom dei mange andre me har nytt. Men i kveld er det likevel Kort møte av Ernst Orvil som er den nye oppdaginga, og min kjære Olav må vika frå dikthjørna til fordel for dette. Men han kjem nok att, kjenner eg meg sjølv rett...

Siste...

I dag, sovidt (der bikka me midnatt ja) har eg mi siste forelesing i bachelorgraden - oppsummeringsførelesing i Brukstekst og pragmatikk.

Onsdag er det (kanskje) siste kollokvie i same fag. Den siste oppgåva på bachelornivå glimtar med sitt fråver (eg er god på utsetjing!) og eg er inne i den siste månaden av dette skuleåret, og dei tre åra (dei tre fyrste åra, vel og merke) i Bergen.

Undarleg kjensle. Godt, trist. Særs blanda. Gler meg til sommaren, men på same tid seier mine raude skuldrer at det er ikkje bra med for mykje av det heller. Hjernen skulle gjerne hatt lengre tid til å førebu seg til eksamen, og mine sosiale nervar skrik etter meir tid med gode "klasse"kameratar - som fer kvar til sitt etter 21. mai.

Men nokre ting vert ved det same - huset står her, soli skin (nokre dagar til seier dei), sommarjobben ventar heima, og universitetet ventar når eg kjem att. Gode vener vert verande, nye kjem til.

Og før ferie og den endelege slutten på bachelorgraden ligg fleire frustrerte blogginnlegg om eksamen, oppgåver osv... Berre vent.

laurdag 3. mai 2008

Valkyrien Allstars

På dansen på onsdag fekk eg ein brosjyre i hendene. "Ja," sa eg før eg fekk tenkt meg om. "Bra!" utbraut ho med brosjyren, og so var det bestemt - me skulle på konsert på Garage med Valkyrien Allstars.
Og det vart ein bra kveld, angrar ikkje på den. Etter ein litt treig start der me folkedansarane sto og trampa takten til eit par gangarar medan resten av kjellaren på Garage prata i munnen på musikken, tok det seg svært opp. Det er moro når ein opplever hardingfeler med slikt driv, uansett om det er til dans eller på rockekonsert. Og det er moro å stå utanfor og høyra bergensarar belja på tekst av Arne Garborg medan dei trampar takten dei enno høyrer etter felene. Veit at nokre synes dette er vel radikalt - men dersom det er underhaldande, i tillegg til at det presenterar folkemusikk på ein ny måte, so er eg for. Særleg når det er pakka inn i ein kveld i godt selskap.

torsdag 1. mai 2008

Oppmuntring

- i ei travel eksamenstid kan komma frå so mange ulike stader. Denne kom over e-post: